ދެލޯބިވެރިން ބައްދާލައިގެން / ފޮޓޯ: ބައިޓްސް އޮފް ނިއުސް
ބައިޓްސް އޮފް ނިއުސްގެ 2007 ވަނަ އަހަރުގެ ފެބްރުއަރީމަހުގެ 07 ވަނަދުވަހު ޝާއިޢުކުރި ސައިންސާއި ޓެކްނޮލޮޖީ ޞަފްޙާގައި މި ހާދިސާއަށް އަލިއަޅުވާލާފައިވެއެވެ. ލިޔުންތެރިޔާ ފިލިޕް ރޫބިއޯ ލިޔެފައިވާ ގޮތުގައި މި ކަޕުލް ފެނިފައިވަނީ އިޓަލީވިލާތުގެ ހުޅަނގު ފަރާތު ރަށެއްކަމަށްވާ މެންޓޯވާ އިންނެވެ. މިދެމީހުންގެ ކަށިތައް ހުރީ ރީތިކޮށް އާދައިގެ ހާލަތެއްގައިކަމުން މިދެމީހުން ތިބީ ބައްދާލައިގެންކަން އެނގުނެވެ. އާސާރީ ހޯދުންތައް ހޯދުމަށް ބިންގަނޑު ކޮންނަމުންދިޔަ މީހުންނަށް މިދެލޯބިވެރިން ފެނުމާއެކު ހައިރާންކަމެއް ލިބުނެވެ. އަދި އެމީހުންގެ އުމުރު ދެނެގަތުމުގެ މަސައްކަތް ކުރެވުނެވެ. ލެބޯޓްރީ ޓެސްޓްތަކުން އެދެމީހުންނަކީ ޒުވާން އުމުރުގައި އެގޮތަށްތިބެ މަރުވެފައިވާ ދެލޯބިވެރިންކަން ޔަގީން ކުރެވުނެވެ. ރިޕޯޓްތައް ބުނާގޮތުގައި މިދެމީހުންގެ ދަތްތައްވެސް ހަމައަށް ހުއްޓެވެ. އެކަމަކީ ލެބޯޓްރީ ޓެސްޓްތަކަށް ލިބިގެންދިޔަ އިތުރު ޔަގީންކަމެކެވެ.
ފޮޓޯ: ބައިޓްސް އޮފް ނިއުސް
އެކަކު އަނެކެއްގެ ގައިގައި ރީތިކޮށް ބައްދާލައިގެން ތިއްބާ ފެނުނު ދެ ލޯބިވެރިން ހޯދި ޓީމުގެ އިސްވެރިއަކަށް ހުންނެވީ އެލީނާ މެނޯޓީ އެވެ. އޭނާއަކީ މިފަދަ އާސާރީ ހޯދުންތައް ހޯދުމުގެ މަސައްކަތުގައި 25 އަހަރު ހޭދަކޮށްފައިވާ ތަޖުރިބާކާރެކެވެ. އެ ދިގު މުއްދަތުގެ ތެރޭގައި އޭނާ ކުރެއްވި ބޮޑެތި މަސައްކަތްތަކުގެ ތެރެއިން ޕޮމްޕޭގެ ބިން ކޮނެ އެ ސަހަރު ހޯދުންވެސް ހިމެނެއެވެ. އެލީނާ ވިދާޅުވެފައިވަނީ މިފަދަ ތާރީޚީ ހޯދުމެއް މީގެކުރިން ދުވަހަކުވެސް އޭނާ ދެކެވަޑައިނުގަންނަވާ ކަމަށާއި އޭނާ މަސައްކަތްކުރެއްވި ބިންތަކުގެ ތެރެއިން އެއްވެސް ބިމަކުން މިހާ ވަރުގަދަ ލޯބީގެ ވާހަކައެއް ފެނިފައި ނުވާކަމަށެވެ.
ޒަމާންވީ ދެކަށިގަނޑު ފެނުމާއެކު މިއަދު އެދެލޯބިވެރިންގެ ވާހަކަ ދުނިޔޭގެ މޮޅެތި ލިޔުންތެރިންގެ ސަމާލުކަމަށްވަނީ އައިސްފައެވެ. ތަފާތު ގޮތްގޮތަށް މިދެ ކަށިގަނޑާމެދު ވާހަކަތައް ލިޔެވެމުން އެބަދެއެވެ. އެއީ ދެލޯބިވެރިންކަމަށާއި އެދެމީހުން އެކަކު އަނެއްގެ ގައިގައި ބައްދާލީ ދުވަހަކުވެސް ވަކިނުވުމަށެވެ. އެރެއަށްފަހު އެމީހުންއެމީހުންގެ ލޯބީގައި ކައްވަޅަށް ދަތުރުކުރިއެވެ. ދިރިތިބި މީހުން އެދެލޯބިވެރިން އެދުނުގޮތަށް އެކަން ފަހިކޮށްދިނެވެ. މި ވާހަކައަށްވުރެ ދިގު ލޯބީގެ ވާހަކައެއް ނެތެވެ. މިހާރުވެސް މިވާހަކަ މިދަނީ ލިޔެވެމުންނެވެ. ގިނަ ލޯބީގެ ވާހަކަތައް އެބައެއްގެ މަރާ ހިސާބުން ނިމިދެއެވެ. ލޯބީގެ ނިޝާނެއް ދުނިޔެމަތިން ފެންނަން ހުއްޓަސް އަސްލު އެދެމީހުން މިނޫނީ ފެންނާކަށް ނެތެވެ.
0 comments:
Post a Comment
މިލިޔުމަށް ކޮމެންޓްކުރެއްވުމަށް ތިރީގައިވަ ގޮޅީގައި ލިޔުއްވާ